فانتازي بالدارجة ( ح 1 ) - توقعات الجولة 10 -

السلام عليكم 

اليوم أول حلقة فهاد السلسلة ديال فانتازي بالدارجة ..

نقدم راسي للي مكيعرفنيش كواحد لاعب فانتازي هادي 4 سنوات ( طبعا ماشي شي نيت نيت لاعب ) وهاد السكرين غ يبين ليك اش كاين ولكن مهم راكمت خبرة اللي غ تخليني واحد العام غ نضرب صدارة الترتيب العالمي ( ضحكو غ بشويا الخووووت ) 

مهم اليوم الترتيب ديالي لا يسر عدوا ولا حبيبا ..

 بعد الجولات اللي دازو كنلقا راسي فترتيب فوق المليون هادشي طبعا عندو اسباب منها انه الموسم الحالي موسم شويا فشكل لا من ناحية المستويات ديال بعض اللاعبين اللي كيتعتبرو PREMUIM اللي منهم فرنانديز  ديبروين وغيرهم .. هادو اللي مكانوش لحد الساعة مؤثرين وهادشي اللي خلا كلشي تيمشي مع صلاح كابتان طول الموسم .. من لخرر كلشي ولا مصري وصلاح فخر العرب .

عموما فاش كيكون عندك فقط لاعب واحد اللي تيصنع الفرق وفاش كندوي على صناعة الفرق كنقصد انه كتلقى معدل نقاط ديالو ثابث بشكل اللي تيخلي انك الا مشريتيهش تخورتي ..

هادشي غ تقديم غ باش اللي معارفش يعرف انه راه وخا ممطفرينوش راه قدااام ..

حلقة اليوم غ تكون على الجولة العاشرة و تحليل بسيط ومتواضع لما يمكن انه نسميوهم 

نجوم الجولة المتوقعين  ( غ ثلاثة ) 

1 -  ماسون ماونت : 

مكاينش لوكاكو وغالبا تا فيرنر الزGال .. و هاتريك واسيست الجولة الفايتة وزيد عليها لاعبين ضد نيوكاسل اللي دفاعيا مقتول .. هادشي كلو تيخلي ماسوت ماونت عندو امكانية كبيرة انه يصنع الفارق فالماتش الجاي وخا لاعبين برا ارضهم ولكن ماونت مع ارتكاز فيه جورينيو والكوايري الرقايقي كوفازيتش كنضن غ يجيب ع الاقل هدف أو اسيست ولا بجوج كاع مالنا اش خاسرين .. 

2- فودين 

وخا غوارديولا القرع عمرك ثيق به ولكن كاين امل كبير انه يلعب فودين الجولة الجاية علاش ؟ 

اولا مكاينش مهاجم صريح فالفريق وغوارديولا الفيلسوف بزاف شي مرات باغي يبقا معكس ويبان انه هو اللي تيربح وبتاكتبك ديالو دكشي علاش كنشوفوه بلا تا مهاجم وتيماركي ربعة وخمسة .. فودين من نهار رجع تيجيب نقط مزيانة واخر جولة جاب 18 وقبلها 6 وقبلها 7 .. بزاف كيشوفو ان ثأثير ديالو هجوميا على الفريق ممتاز خاصة انه كاين وراه غ هوما ديبروين وغوندوكان والمتميز برناندو ... ضد كريستال وفي ملعب الاتحاد كنظن غ يضرب ايديه هاد فودين ..

3 - رودريغو ( ليدز يونايتد ) 

مكاينش بامفورد هداف ومهاجم الفريق الأول وثمن 6,3  وزيد عليها لاعبين ضد نوريتش الفريق اللي تيطلع غ باش اي فرقة تجي تطحنهم ويهبطو للقسم الأول عاوتاني .. كلها اسباب تخلي رودريغو فعلا اختيار ممكن يدير الفرق نيت خاصة مع دفاع واخد سبعة ماتش الفايت وخاصة مع لعب ليدز المفتوح والهجومي وخلاص الى رجع رافينيها راه غ يسقيه بكويرات خاص غ يترجل ويعمر الشبكة ...

مهم كانت هادي الحلقة الأولى وخا مجاتش تا الجولة العاشرة .. عطيت فيها رأي خاص لو متفق او تيبان ليك انه غ يكونو نجوم اخرين للجولة كتبهم فالتعليق وشكرا ...

اه نسيت مدرتش صلاح حيت بالنسبة لي صلاح الا مكانش عندك ومدرتيهش كابتان هاد الجولة راك غ تزيد تغرق وتفوندي ولك في من لم يكبتنوووه الجولة الفايتة عبرة .. 

تحياتي ونلتقي بعد الجولة 10 ..